தொடர்பற்றவைகளால் நெய்த காழகம்
ஓட்டுக்கண்ணாடி வழி
ஊடுருவிய சூரியன்
அம்மாவின் இடத்தை
பிடித்துக்கொண்டது பொழுதுசாய்வதற்குள்
ஒற்றைச் சேலையை நெய்தது
வாரநாள் முடிவில்
வரவுசெலவு கணக்கு தீர்க்க
அப்பன் கொண்டுபோன சேலையிலொன்று காணமல்போயிற்று
சூரியன்மீது சந்தேகம்
சந்தேகம் உண்மையானது
ஆம் அன்று சூரியகிரகணம்
2
பாண்டிநாட்டில் சேலைவிற்கபோன
தாத்தாவை காணவில்லை
சூரியன் கடத்தியிருக்கலாம்
3
அழகர்மலை கல்வெட்டிலிருக்கும்
அறுவை வணிகன்
தொலைத்த காழகம்
கொடுமணலில்தான் இருக்குமோ?
சொல் மதுரைக்காஞ்சியே...
நானும்
தலையானங்கானத்து செருவென்றவன் சந்ததியின் மிச்சம்தான்.
4
அப்பாவின் வேட்டியில்
தூமைத்துணி அளவிற்கான
பகுதியை யாரோ வெட்டியிருக்கிறார்கள்
நெடுஞ்செழியனே
உன் மனைவியின் யோனியை
சோதிப்பாயாக.
5
பல
..டட்டக் டட்டக் டட்டக் டட்டக் டட்டக் டட்டக்..
ஒரு நூற்சேலை தயார்
6
புற்களுக்காக அலைந்த பசுவொன்று
என் வீட்டினுள் நுழைந்தது
பாவோ(ட்)டி கொடுத்துப்போன
பச்சைநிற ஊடைநூலை
மேய்ந்து தள்ளியது
துடைப்பம் கொண்டு
சாபம்விட்டபடி துரத்தியடித்தாள் அம்மா
'ஆசேந்தவழி மாசேப்ப'
மாங்குடி மருதனின் இவ்வாக்கு பலிக்க...
7
என்ன செய்யலாம்?
தறி ஓட்டலாம்...
8
ஐம்பது வயதில் அம்மா கர்ப்பமாயிருந்தாள்
அவமானப்பட இதிலே என்ன இருக்கிறது
அழகாக ஒரு தறியை ஈன்றெடுத்தாள்
9
சாயக்காரனிடம்
சிகப்பு வண்ணம் பற்றாக்குறை
மாதவிடாயிலிருந்த மகளை
சாயத்தொட்டிக்குள் அனுப்பி வைக்க
'செந்துவர்' வண்ண நூல் தயார்
10
கரிசல்மண்ணின்
'நெய்தல்'வாசி
நாங்கள்
- தமிழ்மணி
Comments
Post a Comment